Bedriye Topaç 1977 de Dêrsim de dewa Markasorî de ameye dinya. Panc serrê dibistanê û di serrê wendegehê mîyanênî, yanî hewt serrî mektebê yatilî de wend.
ŞEWE VIRAN A
Ti kî hesnena?
Bihesne!
Pelê şewe rişînê
Hêdî-hêdî
Çiman ra nimitkî
Bêvengîye de…
Goş bide vengê şewe
Şewe viran a emşo
Ti kî vînena?
Bivîne
Şewlê aşme vila beno
Hêdî-hêdî
Roştîye ra dûrî
Tarî de…
Goş bide vengê şewe
Şewe viran a emşo
Ez şewe ra viranêr ra…
BORANÎ Û DOMANÎ
Boranî estê sêneyê domanan de
Boya gelîyan awiran de
Çerexînê, çerexînê, çerexînê…
La asmên yew Homayê bakîrî rê qurban kerdo!
RÊÇA ZERRÎYA MI MANENA
Ez şewdirê yew şewa xerîbe de xatir wazena
Hesirê çimanê mi rişînê şefeq ro
Rêça zerrîya mi manena nê kuçan de
Bêkamîye…
Û bêkes…
Xemgîn mebe
Ez to rê versîya huyayîşê xo yê dejinî verdana
Yew kî çekuyanê ziwanê bêwayîrî…
O WEXT
Yew vile bena zergûne
Pel bi pel bena a
Pel bi pel û bihêvî
Rengan weçînena cuye ra
Va qisey keno koyan de
Nermek-nermek…
Her çî beno kêmî
Vile zêdîna bêveng
Wisar yeno o wext
O wext
Tena o wext
Versîya gozêre de tenayîye mirena
Şaristanî virar fînenê remayoxan ra
Yew dilopa şilîye bena behr
Yew estare beno asmên
Şîîre bena waştîye şaîran rê
Vana û vana…
Herekîna royan de
Herekîna Dîcle de o wext
O wext
Tena o wex
ÇEKUYÊ BÊZIWANÎ
Ez to rê mektuban nusena
Yew şaristano vîndîbîyaye ra
Yew ziwano lal ra
Ez to rê mektuban nusena
Destanê Zarîfe de mawzer
Sêne de Alîşer
Ez to rê mektuban nusena
Koyanê welatî de adir
Çekuyanê bêziwanan de eşq
YEW STRANE DE
Ez yew strane de
Cayo tewr şikîyaye de ya
Hîtîya lewan esta
Girpayîşê zerrî
Û bêqusur xo dayîşê bedenan esto
Ez yew strane de
Cayo tewr şikîyaye de ya
Viranîya mi esta
Destê destanê vêşanan de
Û qîrayîşê mi esto
NEQŞÊ MA TARÎ YO
Neqşê rengan o tarî
Neqşê qederê ma
Hurdî-hurdî gineno çixiranê rîyê ma ro
Neqşê rêça ma yo tarî
Neqşê ruhê ma
Giran-giran gêreno şewanê ma de
Neqşê lewanê ma yo tarî
Neqşê şerabê sûrî
Honik-honik herekîno reyanê ma de
RENGÊ EŞQÎ
Çi rind a na şewe
Asmên herekîno verara erdî
Çi weş ê nê astereyî
Erd herekîno verara asmênî
Rengî reqeşînê
Royî deyîran vanê
Tu çîyêk cayê xo de nîyo
Tu çîyêk bêreng nîyo
Her çî asî yo
Her çi qîrayîş de yo
Camerdîya to leşa mi de
Cinîyîya mi leşa to de
Çi weş eşq beno zergûn
ESTANIKA HEWTÎ
Tîje bena berze hewt koyan ser de
Peyê hewt beranê asinênan de
Hewt merdimê bêhewnî deyîran vanê
Hewt zerrî girpenê
Hewt waştî jîvenê hewnan de
Hewt teyrê bêperrî asmên de çerexînê
Tîje bena berze hewt koyan ser de
Û destê mi
Destê mi benê berz surelayê tîje de
Destanê mi de hewt toximê hinare
Hewt hesirî herekînê çimanê mi ra
Çimê mi bêkes manenê
NÊMCETÎYE
Koyî berz
Daristanî zergûn
Asmên kewe yo
Behrî gird
Teyrî azad
Cuye rind a
La bê eşq pêro nêmcet
Pêro bêwelat ê…
BAWER BIKE
Rojêk dêsî rijînê vengê to ra
Yew ber beno ra
Asmênê to de astereyî benê zergûn
Huyayîşê to de gulanî..
Û şîîrê bêwareyî resenê pelan
Bawer bike
Bawer bike…
VENGÊ HIRÎS Û HEŞTÎ
Reqayîşê hewran nîyo no
Vengê çekan o
Şewlê tîje nîyo no
Çîkê qersunan o
Kişenê
Kişenê
Ma kişenê…
Ez “hîris û heşt” de ya
Dest û çimê mi giredaye yê
Goşanê mi de qîrayîşê çewres milaketan
Zerrîya mi de tenayîya jîyar û dîyaran…
Veng bide vengê mi
Veng bide Xizirê roja tenge
Vajê bireso
Vajê bêro
Vajê kirmancîye kişenê
Vajê kirmanckî kişenê…
PIRD
Ju pird esto
Zerrîya koyan de
Duştê golê Xizirî de
Ju pird esto
Mavênê min û domanîya mi de
Bover de goristanê mi
Naver de cendekê mi esto
Ju pird esto
Bover de terteleyê hîris û heştî
Naver de domanê soyî estê
Ju pird esto
Bover de ti
Naver de ez vinetîmê
Ju pird esto
Hewnanê mi de beno derg
EVÎNA MI
Şewe zindan a ma ser de
Destê erd û asmênî zerzekerde yê..
Û raywanîya ma semedê welatê çinbîyayî ya
Dûran ra vengê yew cinîke reseno goşanê ma
Tamê şîwareyan de deyîran vana
Hezar kardî ginenê birinanê ma ro
Ti vanî:
– Ax evîna mi ax
Rind guh bide, ev dengê erdê me ye
Ev qîrî qîrîna birinên me ye
Tu êşek wekî êşa me nîne
Tu hêrs wisa asî nîne
Yew helî fir dano koyanê berzan ser de
Esterayode kewe gineno awa Munzurî ro
Çewres hêvîyî benê zergûn awa Xizirî de
Çewres domanî huyenê hewnan de
Yew şilîye dest pêkena
Yew laser herekîno
Çimanê mi ra yew behr koç keno
Ti vanî:
– Evîna mi megrî
Girîna te qîyameta min e
Hêsrên çavên te tofanê radikin li singê mi
Rojhelata dilê mi dirije, megrî…
HIRÎS Û ÇAR WISARÎ
Ey tarîx!
Ti nêvînenî,
Goşê to vengê mi nêhesnenê…
Ti zanî ez kam a?
Ez şaro esmer a
Ez vengê koyan a
Ez mîyanê pelanê to der a
Û destê mi tim yaxeyê to der ê!
Ez serdê yew şewa vîndîbîyayîye de
Binê vewrêsan ra hîris û çar wisaran vejena…
https://www.bernamegeh.org/2019/08/13/jiyana-bedriye-topac/
