Bedriye Topaç 1977 de Dêrsim de dewa Markasorî de ameye dinya. Panc serrê dibistanê û di serrê wendegehê mîyanênî, yanî hewt serrî mektebê yatilî de wend.
Serra payêne ya wendegehê mîyanênî û lîse Anqara de wendî. Nuşte, hîkaye û şîîrê aye reya verêne 2011 ra dest pêkerd rojnameyê Newepelî, kovara Şewçila û keyepelê Zazakî.net de weşanîyayî.
BERHEM:
Bero Sûr, Weşxaneyê Roşna, 2012
BÊKESÎYA MA
Axx na bêkesîye
Na bêkesîya min û to
Na bêkesîya şaîre
Na gejîya fîrarîye
Erd lal
Asmên lal
Bêkesîya ma zirçayiş der a
Yew pele nêlewina
Yew dilopa nêherikîna
La ma tarûmar bîme na bêkesîye de
Porê mi vayê na bêkesîye de vila beno
Tel bi tel viran maneno
Sêneyê to yo bêkes de bêedebê destê mi
Sêneyê to yo bêkes de asîyê lewê mi
Zerrîya ma tena na bêkesîye de sixlet
Lawikê ma tena na bêkesîye de biveng ê
Axx na bêkesîye
Na bêkesîya min û to
Wa tim wina bêkes
Wa tim wina yê ma bimano.
https://www.bernamegeh.org/2020/11/10/helbesten-bedriye-topac/
