Di sala 1954’ê li bajarê Şirnexê hatiye dinê. Yekemîn car helbestên wî di kovara Tîrêjê de (yekemîn kovara kurdî ye li bakur) de hatiye belavkirin. Heta niha helbest û nivîsarên wî di gelek kovar û rojnameyên Kurdî de belav bûne, mîna (Nûbûn, Nûdem, Jiyana Rewşen, Nûbihar hwd.) Di sala 1998-1999’an de di pêşbirkên helbestê yên ji alî Komeleya Malbatên Girtî û hikumxwariyan û ji alî Kovara Rewşenê amade kirî de bi xelatên 1.min û 2.mîn hate xelat kirin. Di sala 1999’an de bi navê “Kulîna Kulîlkan” kovareke înternetî amade kir. Çar hejmar derket. Ev yekemîn kovara înternetî li bakur bû. Helbestên wî di Tv’yên Kurdî, (Medya Tv, Roj Tv, Gün Tv…) Radyoya Elmanî WDR û SBS ya Avustralyayê de hatine xwendin. Hin helbestên wî bi navê (Kalbim Yastıktır Aşka) li Tirkî, hin li Elmanî, Erebî û Farisî hatin wergerandin. Li zanîngehên Zankoya Bilgî ya Colemêrgê teblix belav kir û çendîn Komeleyên Civakî de tevlî konferans û panêlan bû. Hê jî di kovar û rojnameyên Kurdî de nivîskariya xwe didomîne.
BERHEM:
Êş, Weşanên Sî, 2001
Şagirtên Evînê, Weşanên Sî, 2003
Pandomîm, Weşanên Belkî, 2006
Şîna Helbestê, Weşanên Doz, 2008
Dilê Min Palgeh e Ji Işqê Re (digel ên berê-şerbeta ji êgir û haiku-hemû berhem), Weşanên Lîs, 2011
Ji Dûriyê Re, Weşanên Lîs, 2013
Xewna Dawî, Weşanên Lîs, 2016
Werger:
Lapis Lazuli, Mehmet Altun, Helbest, Babil, 2012
A Deryayê Gotî, Mustafa Köz, Helbest, Weşanên Lîs, 2012
EZ Û WELAT
welatek min heye ji rengê êşê
li her baniyek wê xewnek min paldayî
robar û çiyayên wê yên min in
yên min in qaz û quling, dar û deviyên wê
xortaniya min li wir rabû pêdarê
baz û beytakên min li wir çûn sêdarê
beza min, coşa min, xemginiya min li wir
min li wir vexwar jehra dildarê
ez xwe dibinîm di her stranek wê de
di her gotinek min de hezar bîranînên wê
ku roj hat hewceyî dermanî bû
min bikin berdêl gorî serê wê.
