Lîlav Îsa, di 13’ê Berfanbara sala 2000’î de, li Kobanê ji dayîk bûye û paşnavê wê yê rast EbdElrehman e. Di warê perwerdehiyê de wê ji qonaxên seretayî heya lîseyê li Kobanê xwendiye û hêj jî xwendina xwe berdewam dike.
Di destpêka şoreşa Rojavayê Kurdistanê de di sala 2012’an de wê di navenda Partiya Demokrat a Kurdî ya Sûrî de dest bi xwe fêrbûna zimanê Kurdî kir û heya sala 2014’an her sê astên zimanê kurdî bi dawî kirin. Di ber xwe fêrkirinê de wê gavek din avêt û di 15’ê Îlona 2015’an dest bi nivîsandina helbestan kir û zêdetirî heştî helbestî ji hestên xwe afirandiye, di heman demê de wê di ber helbestê re jî gotar, jîname û çîrok jî dinivîsandin.
Ji ber vê yekê wê piraniya berhemên xwe di rojnameya Dengê Kurd û Kovara Şermola de weşandine. Her wiha di 10’ê Îlona sala 2017’an de jî wê dest bi amadekirina pirtûkekê kir, ew pirtûk jî li ser pakrewanan bû û ew jî weşanên Şilêrê ye. Wê di pirtûka xwe ya bi navê “Manî û Maniya” de çîroka 19 şehîdên berxwedana Rojavayê Kurdistanê ku piraniya wan ji Kobanê ne kiriye û ev dibe yekemîn berhema wê.
